政壇：劉國勳甘做乖仔
新一屆區議會下周開始選舉正、副主席，早前多區傳出建制派內訌，爆發爭位戰，但隨着選舉臨近，正、副主席人選開始塵埃落定。其中北區區議會早前傳出今屆自動當選嘅民建聯劉國勳，有意挑戰黨友、現任主席蘇西智競逐主席。不過，我哋聽聞劉國勳考慮過後都係做番「乖孩子」，選舉當日，仲有意帶領年輕黨友提名蘇西智出任主席，等對方再坐一會！
劉國勳接近衝線一刻突然急停，點解會咁反高潮？劉承認近年世代交替呼聲高，無論黨內兄弟以至領導層對佢都有所期待，但佢認為，假如蘇西智暫時無意退下火線，為顧全大局，佢亦會尊重前輩決定，相信其他同事都會繼續支持。佢又話從政嘅人，除咗做區議會主席，仲有好多平台可以發揮，今次嘅決定唔存在被勸退嘅情況，最緊要係建制派團結同穩定。
傳向EQ逼宮戰新東
至於係咩其他平台令劉國勳甘心做「乖孩子」唔爭位？佢就大賣關子，只係話來日方長，仲有好多機會。至於北區副主席人選，相信會由粉嶺鄉事委員會主席李國鳳，接替侯金林出任副主席。
今年三十五歲嘅劉國勳政途相當順利，○七年當選區議員至今，除咗係民建聯北區支部主席，處理北區水貨客問題亦得到黨內賞識，因此區選後「起跑」階段，由佢接任主席嘅呼聲甚高。但劉今次寧願做乖仔，唔通真係另起跑道，向失落區選嘅EQ葛珮帆「大逼宮」，九月出戰新界東？相信好快會有答案。
