日子難過年年過，眨吓眼又到除夕，聽日就係新嘅一年開始，家陣又係回顧及展望嘅時候。如果問香港人嘅感受，相信好多人都會慨嘆：王小二過年，一年不如一年。

唔係誇張o架，近年香港好似撞邪咁，諸事不順，頭頭碰着黑，只可以用「沒有最亂，只有更亂」嚟形容。即將過去嘅一年，話就話冇再發生大規模嘅佔領運動，但一樣係紛紛擾擾，永無寧日。上半年因為政改爭拗而搞到七國咁亂，最後政改方案以鬧劇收場，香港民主原地踏步事小，社會元氣大傷事大。

政改落幕後，港府口口聲聲要聚焦經濟民生問題，結果又點呢？講起就可悲。一場鉛水危機害到居民人心惶惶，跟住港大副校長委任風波又搞到滿城風雨，加上學校TSA爭議不休、版權修訂條例無風起浪等等，港府施政烏龍百出，甩甩漏漏，小事變大事，大事變危機，睇見都眼冤。

冇法子喇，港產官僚志大才疏，眼高手低，本身已經烏龍百出，加上社會高度政治化，反對派乜都上綱上線，為反對而反對，為拉布而拉布，導致立法空轉，行政癱瘓，港府「成熟一項、推出一項」，淪為「推出一項、跪低一項」，都唔知好嬲定好笑。

最可怕嘅係，隨着社會愈來愈政治化，激進組織走向偏激及暴戾，一再衝擊法治底線，有人膽大包天製造炸彈，有人甚至喺立法會門外嘅垃圾桶縱火引爆，問你怕未。家陣嘅香港就好似荷里活電影嘅葛咸城咁，邪氣沖天，群魔亂舞，唔怪得連黑幫都咁囂張，居然高調到要開記者會喇。

屋漏偏逢連夜雨，香港問題多多，深層次矛盾千頭萬緒，又點止政治爭拗咁簡單吖。旅遊業步入寒冬，零售等相關行業大吹淡風，成個市道有如一潭死水，經濟前景暗淡，喺咁嘅情況下，社會仲深陷政治泥沼，一味內鬥內耗，想唔死都幾難。所以話，展望來年唔慌有好日子過，尤其係美國已進入加息周期，本港樓市面臨衝擊，加上內地經濟形勢不妙，香港受到多重夾擊，有運行至出奇吖。以前香港經濟唔掂，仲可以靠中央打救，家陣內地自顧不暇，就算想救香港都無能為力喇。

無論點都好，舊嘅唔去，新嘅唔來，未來一年有未來一年嘅煩惱，香港睇怕都幾難清淨嘅喇，大家惟有自求多福，希望平平安安！