城中鏡：「行」善最樂
香港善德基金會早前舉行成立一周年晚宴，唔少政商界名人結伴捧場。近年愈嚟愈多機構籌辦大型戶外運動，成功製造嘉年華效應，創會主席董吳玲玲都好雀躍話，基金會之前首次舉辦一連四個周末舉行嘅「善德遠足百萬行」，號召逾三千人次參與，結果有啲朋友真係愛上咗行山，仲不時約埋一齊行，確係意外收穫。
董吳玲玲（右）同常務副主席陳國超將晚宴搞得有聲有色。
余鵬春急不及待着唐裝周圍去，右為太太徐菊霞。
葉俊亨（左二）同鍾佩雲（右二）帶埋兩位女兒一同出席晚宴。
董太話期待未來可將呢個有益身心嘅活動，打造成基金會嘅旗艦活動，提醒大家欣賞香港。在場見到裕華國貨董事總經理PC余鵬春同太太徐菊霞、基金會永遠名譽會長葉鍾佩雲同老公、卓悅控股主席葉俊亨都嚟撐場。仲未過農曆年，PC已着住唐裝周圍去，佢解釋話近期天氣時冷時熱，唐裝嘅好處係天氣凍時可以扣鈕扣到上頸，咁就冇咁凍嘞！
葉俊亨無懼「息魔」
講起近期生意難做，投資市場多變，PC特別關注人民幣貶值令港元變強勢，擔心會進一步減低內地人來港消費意欲，而港人就更有出埠旅遊興致，令本港零售生意雪上加霜。葉俊亨就對淡市睇得開啲，事關由前年佔領行動開始，零售業生意已經差咗，最近咪趁聖誕、新年等傳統消費旺季做番多啲生意，拉上補下囉！佢仲話希望最差嘅環境已經過去。
最近美國加息，一般預料本港息口將重拾升軌，好多人驚樓價會跌，葉俊亨認為加息對樓市影響應該唔太大。不過，同場嘅新界社團聯會理事長陳勇就話好擔心，事關佢仲供緊樓囉！
