政壇：搞搞政：淫照轟炸嚇喊林琳 區議員呻私隱不保
過往不時有區議員投訴，佢哋嘅私隱毫無保障，例如住址、電話號碼等個人資料，好容易喺網上搵到。荃灣區議員林琳對此深有同感。佢話喺九月底區會最後一次會議，當時佢準備發言，手機突然接收到一堆圖像。最初佢不以為然，細看之下先發現係男性性器官嘅自拍照，仲一連向佢發送十幾幅唔同角度嘅照片，嚇到佢衝入休息室大哭，平復心情後先返回會議室發言，回家時都心驚驚。翻查紀綠，原來佢喺一三年將發相人加為社交網站朋友，雖然對方嘅個人資料附有手提電話號碼，但警方最終都係查唔到真兇，成為無頭公案。
孫明揚（資料圖片）
佢批評當局對區議員嘅私隱保障係零，建議日後喺網上查閱區議員資料時，需規定查閱者要填寫部分個人資料，一旦相關區議員遇到襲擊或者滋擾，都有線索追查，以免女性區議員終日擔驚受怕。佢又話知自己成日畀網民評頭品足，但絕對唔會因此而改變自己嘅衣着。
「哈佛小甜甜」感同身受
其實林琳嘅遭遇只係冰山一角，仲有好多各類型嘅騷擾個案。外號「哈佛小甜甜」嘅候任南區區議員任葆琳透露，由選舉開始至今每日都收到無來電顯示嘅電話，但對方從來無出聲，而且好快收線。佢曾報警，但警方以滋擾性不足為由拒絕處理。此外，佢又試過喺街畀一名「中指男」騷擾，雖然佢冷靜擊退對方，但認為區議員只係普通市民，唔明白點解要公開自己嘅個人資料。俗語話「食得鹹魚抵得渴」，佢就反駁：「條鹹魚有乜咁正先？」
