政壇：新思維戰新東 話鎅票係侮辱
白鴿黨前成員Dick狄志遠同黃成智牽頭成立嘅新思維，尋日宣布有「強烈傾向」派員參與出年二月立法會新界東補選，但由於有多過一個成員表態有意出選，人選要經下月八號黨內投票決定。
狄志遠宣布新思維將派人出戰立法會新界東補選。
阿Dick否認出選係鎅走泛民主派選票，認為咁講係侮辱，扼殺咗市民嘅選擇同第三道路嘅生存空間。咁又係嘅，議席唔係任何黨派嘅私產，點解唔講成新思維被鎅票呢？
阿Dick話黨內經過四至五輪討論，前晚決定派員參與新東補選，但因礙於選舉條例，將喺一月七號籌款晚宴，以及八號黨內投票再公布。據知，人選方面會係阿Dick同黃成智「二揀一」，但兩人各有支持者，所以黨內未有一致共識。
公文袋早前已宣布派楊岳橋參加補選，被問及會唔會鎅走泛民選票，阿Dick斥鎅票係侮辱，認為第三條道路有自己嘅支持者，同時佢哋成員有建制亦有泛民，所以要鎅票就兩方面都會鎅。佢又覺得即使泛民今次喺補選落敗，對立法會政治版圖嘅影響唔大，相信建制派唔會趁機強硬修訂《議事規則》。此外，據聞本土民主前線發言人梁天琦同建仔嘅周浩鼎都有意參加補選。
