政壇：樓盤銷健身 水着Model「送暖」

臨近年尾樓市凍冰冰，但新地旗下元朗錦田北峻巒就熱辣辣。新地尋日推介峻巒第一期會所嘅泳池設施，話整個項目總共有六大泳池，單係第一期就有水動健身室同二十五米長室內同室外泳池。個水動健身室仲係城中獨有嘅，新地仲特登安排咗水着Model姐姐現場演繹水中單車健身大法。雖則話這個冬天不太冷，但尋日下晝實在都有啲寒寒哋，睇見水着Model姐姐浸喺水入面，驚姐姐凍親喎。但原來唔使驚，新地話水中健身時須運用唔同肌肉，對核心肌肉群訓練好有幫助；最重要係，呢個室內水動健身室有恒溫功能。咁就唔止暖番晒，直頭即刻變熱辣辣！