近排政界盛傳新民黨主席、立法會議員葉劉淑儀，考慮搵大律師Eunice容海恩喺下屆立法會選舉出戰新界東，可想而知，葉劉同Eunice非常友好。不過，原來Eunice同西九新動力主席、立法會議員梁美芬都識咗好耐，據聞梁美芬都有問過Eunice有冇興趣從政，但Eunice就婉拒咗對方，最後投向葉劉懷抱。

婉拒師恩兼同事情

坊間一直流傳Eunice有「法律界桂綸鎂」稱號，但有指其實佢真人同藝人吳綺莉仲似樣，更靚多幾分添，令人眼前一亮。Eunice多年前由加拿大回流香港，之後去城市大學攻讀法律，原來梁美芬都有教過佢，之後兩人又一齊喺城大教書。

Eunice起初都有去西九新動力幫手，成績唔錯，梁美芬曾問佢有冇興趣參與多啲政治，但Eunice事業剛剛起步，所以一口拒絕，婉拒梁美芬嘅好意。雖然之後兩人較少合作，但Eunice都有繼續幫手做義務律師同免費法律諮詢等工作，直到喺新家園協會幫手時認識咗葉劉。

當時Eunice嘅事業已經開始穩定，葉劉又湊巧想搵Eunice幫手，兩人於是合作無間，葉劉仲問Eunice有冇興趣參選下屆立法會。話說回頭，如果梁美芬有繼續同Eunice合作，今日佢會唔會仲係西九新「動力」呢？

據知，Eunice仲未決定係咪出選，因為如果當選，就差唔多等如半個人轉咗行，少咗時間從事法律工作，隨時會影響做資深大律師嘅機會，算好大犧牲。但有邊位從政者唔使犧牲呢？

第一手消息請下載on.cc東網iPhone/iPad/Android/Windows Phone Apps