沙石多斜度大 老手都唔敢博
【本報訊】 八仙嶺仙姑峰的馬騮崖岩壁陡峭，加上多浮沙碎石，傾斜度大兼無樹木借力，一旦失足隨時粉身碎骨。縱有數十年行山經驗的「老師傅」，亦不敢冒險搵「命仔」較飛，貪方便抄捷徑登頂。昨日發生意外後，兩名僅有半年行山經驗的大學生偏偏因岩壁近乎垂直的難度，「唔怕死」挑戰自己，兩人雖最終安全登頂，惟過程驚險萬分。
登仙姑峰的「捷徑」旁有危險警告牌。
結伴同行的兩名一年級大學生，分別姓陳和姓卓，抄同一捷徑攀爬上仙姑峰頂，期間手腳並用爬上十米高峭崖，確實一步一驚心。安全登頂後，他們坦言想挑戰自己才攀爬峭壁，因事前不知道有人墮崖，故沿途見到岩石有血漬及有樹枝被砸斷都感奇怪。
冇樹掹住 容易跣腳
他們認為，倘經驗足夠，抄該條捷徑攀爬應無問題。因攀爬時手腳並用，故跌倒時要講究技巧，千萬不可向後跌。為安全計，他們絕少獨自行山，盡量有人作伴，「出事嗰時有個照應，咁樣安全啲。」
另外，小學時已開始行山、至今有數十年經驗的葉先生，直指馬騮崖浮沙碎石多兼斜度大，容易跣腳，「冇乜樹畀人掹住，好容易一失手就唔知跌落去邊個位」。葉又稱，馬騮崖曾發生多宗事故，其中九六年的山火燒死多名師生，他勸喻行山人士千萬不要攀爬該崖，「我以前行過都覺得危險，依家年紀大咗，更加唔敢再行喇，寧願改行較遠、相對安全及較易的路徑。」
