香港近年好似撞邪咁，大型基建工程問題多多，除咗高鐵好事多磨，其餘幾條新鐵路線亦唔好得幾多嘅咋。就好似沙中線咁吖，先有土瓜灣站工地發現古物，繼而挖出疑為二戰時添馬艦嘅金屬物，搞到工程進度滯後，可謂一波多折。

咁都不特止，沙中線鑽石山站嘅擴建工程項目，早前被本集團揭發承辦嘅新加坡聯營公司出現財困，一度令人擔心工程會否受影響再延誤，真係大話夾好彩，最終由港方成員公司頂硬上獨力孭起整個項目，如果唔係又唔知拖到何年何月嘅咋。

講真吖，地盤掘出古物就話賴天賴地啫，家陣外國聯營公司忽然財困跳船，負責審批工程合約嘅港產官僚絕對係責無旁貸，無得抵賴啦啩。小市民難免要問，外國投標公司有冇相關資質o架？工程審批有無監管o架？監管制度又係唔係甩甩漏漏嘅呢？

正如業界人士話齋，今次事件係對港府嘅當頭棒喝。可惜吖，言者諄諄，聽者藐藐，發展局唔係加強監管，反而計劃進一步開放本地建造市場，前年宣布計劃改革承建商名冊制度，除咗建議取消承建商嘅二十四個月「試用期」，仲想畀名冊外嘅海外承建商直接躋身丙組承建商，承接超過一億八千萬元嘅合約，唔通外國嘅月亮真係圓啲？

冇錯，香港係國際城市，全球招標實在係無可厚非，弊在港府一向迷信洋和尚會唸經，早就鬧出唔少笑話嘅喇。好似西九文化區咁吖，前後三任行政總裁都係洋人，英國人謝卓飛上任冇幾耐就詐病辭職，繼任嘅澳洲人連納智又以健康理由劈炮，結果咪添煩添亂，醜聞多多囉。更離譜嘅係，最後居然畀曾蔭權爵士嘅愛將栢志高冷手執個熱煎堆翻閹，問你服未。

仲有呀，港鐵、醫管局、纜車都成日以為外國嘅月亮特別圓，結果無不前仆後繼中過招，最後仲要貼錢送瘟神，洋人管理層拍拍屁股返老家歎世界，剩低嘅爛攤子，咪一樣要由本地人收拾，可見洋和尚未必會唸經，反而分分鐘搞出個大頭佛呀。

一句講晒，香港唔係冇人才、冇資金，而係當局有鋪崇洋媚外癮，好難戒。話時話，基建工程項目閒閒地涉及以百億計，加上基建延誤同超支已成常態，喺咁嘅情況下仲要一味依賴外援，結果只會添煩添亂嘅咋，叮！