富商鄭躬明同太太陳君宜與莊思敏都有份投資嘅點心旗艦店尋日開幕，以Little Twin Stars公仔造型設計點心作招徠，獲得唔少好友撐場。有份設計食物嘅陳君宜，有信心打造成最有型嘅點心神話，莊思敏進軍飲食界，期望能食出個未來。

鄭躬明（右起）同太太陳君宜有份投資嘅點心旗艦店尋日開幕。

莊思敏（右）莊思明兩姐妹有信心公仔造型點心好受歡迎。

趙嘉懿五歲半嘅大仔都嚟試食。

曾先後開時裝店、化妝學校同經理人公司嘅莊思敏，做過多瓣生意，始終覺得做飲食最穩陣，佢話：「搞生意一定有風險，覺得零售最難做，賣唔出會壓死啲貨，但做飲食衰極都有得食，起碼填飽個肚先。以前諗過賺百萬已經好好，但依家啲人做飲食可以賺過億，所以我要將個目標定高啲，希望上市，不過要靠拍檔先得！」

未來點心店仲會喺澳門同內地開分店，又計劃喺香港開中央廚房，集中食物處理，計劃多多。莊思敏話Little Twin Stars係佢年齡層嘅集體回憶，對於港人習慣食飯前相機先食，所以對得意造型點心好有信心。尋日嚟捧場嘅包括佢胞妹莊思明、模特兒陳祉妤、藝人張致恒同女友莊端兒外，趙嘉懿同老公亦帶同五歲半嘅大仔嚟試食。

第一手消息請下載on.cc東網iPhone/iPad/Android/Windows Phone Apps