城中鏡：花樣菁英
香港菁英會日前舉行以「花樣年華」為主題嘅聖誕派對，講起懷舊造型，榮譽主席楊華勇可謂一絲不苟，特登上網搜尋相關電影劇照嚟參考，又喺櫃桶底搵番十幾年前條懷舊印花呔嚟戴，佢仲話呢身打扮重點係恤衫入面一定要袋住支筆，咁先有當年嘅神髓喎。
菁英會榮譽主席施榮忻（左起）、盧金榮同楊華勇出席聖誕活動。
陳光明（左）同周雯玲大談昔日回憶。
發展局政治助理馮英倫（左）同甄韋喬（中）嘅兒子甄偲瀚做過同事。
菁英會主席盧金榮雖然冇扮嘢，但係講起花樣年華亦相當興奮，佢話讀書嘅年代好興留長陰，佢亦留埋一份，常務副主席莊家彬就染過紫色頭髮，估唔到佢哋都係走在潮流尖端。
但講到最經典，一定係八十年代紅極一時嘅「郭富城頭」。菁英會成員潘偉業都有剪過，仲話當年成班男同學都係呢個髮型，依家舊同學聚會時，間中摷番啲舊相出嚟睇，大家都忍唔住笑。潮流嘅嘢，通常都同父母喜好有別，副主席甄韋喬就試過將髮尾留長少少，點知媽咪睇唔過眼，竟然趁佢瞓覺時剪咗佢，佢瞓醒先察覺，真係好慘。
難忘戴重耳環變「大耳窿」
女士則有另一種回憶。成員周雯玲話讀書時興戴大耳環，但由於大耳環太重，戴戴吓會墮到個耳窿愈嚟愈大，仲會好痛，後來佢嗰耳窿仲慢慢埋咗口，依家惟有戴吓頸鏈、手鏈等其他飾物，一樣咁開心。
除咗打扮，食物亦勾起唔少人昔日回憶，所以榮譽顧問陳光明最近就代理一個舊雪糕品牌，喺台灣推出懷舊粒粒雪糕，結果好受歡迎，而近排仲同一部電影合作推出玻璃瓶玫瑰花雪糕，將懷舊嘢以新形象不斷延續落去。
