政壇：金融才俊 呻港男壓力大
連金融才俊都呻「港男壓力大」！講嗰位係中國銀河證券旗下中國銀河國際證券（香港）嘅環球市場部聯席董事Chris王柏勤。Chris個團隊主要負責公司嘅香港期權客戶，佢今年二十六歲已做到呢個位，佢自己以筆名「歐陽一心」出嘅教炒期權書面世首月仲上埋暢銷書榜冠軍，佢咁都話有壓力？
王柏勤
Chris慨嘆喺香港做男人壓力幾大，話社會對男人期望高，當年紀愈大要面對買樓、結婚、養細路種種負擔，呢啲都足以拖冧一個男人嘅財政。
唔知係咪對呢個問題特別有感受，Chris涉足嘅瓣數奇多。佢早喺大學Year 2已同朋友搞出版社「墨出版」，專將網絡神作出版成實體暢銷書，其中一本就係都幾多人識嘅《男人唔可以窮》，個古仔深深刺中港男最痛，後嚟拍成電影。個古仔紅得起，Chris認為或多或少同香港社會現象有關。
