政壇：墨電訊大亨 跌咗「洪都拉斯」

幾年前，斯利姆曾連續四年係全世界最有錢嗰位，但佢今年身家大縮水，縮咗差唔多200億美元（大概1,560億港元）。等於唔見咗大概成個洪都拉斯經濟咁啦！

斯利姆呢兩年都喺富豪榜做二奶，佢揸住57%股權嘅電訊公司America Movil，今年股價跌咗18%，七年嚟最甘。

想當年，America Movil壟斷墨西哥七成手機同六成二固網網絡幾威威，仲帶挈斯利姆由一○年到一三年連續四年做全球首富。但自從墨西哥政府要打破壟斷，America Movil焗住將電訊網絡開放畀其他公司後，佢哋業績就係咁跌，斯利姆一四年起連首富個朵都冇埋。