話說立法會議員陳克勤同漁農界議員「高佬賢」何俊賢尋日到位於三門仔嘅魚類批發市場，同漁護署開會商討早前出現大量死魚嘅問題，竟然意外發現「出土文物」喎。高佬賢仲即刻幫克勤影相「存證」，克勤就拿拿聲擺上社交網站。大家咪諗多咗，講緊嘅「出土文物」只係打字機啫！

意外發現呢部打字機，何俊賢即刻幫陳克勤影相「存證」。（互聯網圖片）

克勤話嗰部打字機係政府公物，依然運作良好。講到打字機，就勾起佢當年上暑期打字班嘅回憶。佢話當年學打字係想有一技傍身，屋企人仲用八百元買咗一部手提式打字機畀佢練習之用。佢笑稱打字好辛苦，事關想打得清晰就必須夠大力，同依家嘅鍵盤可以輕鬆「求其打」係兩回事。

第一手消息請下載on.cc東網iPhone/iPad/Android/Windows Phone Apps