明年一月新一屆區議會開波，首次會議將選埋區會正、副主席，更係各個政黨必爭之席。早前我哋預告過北區戰況，指建仔劉國勳有意「升呢」做副主席，但戰況不斷升溫，外傳佢原來劍指主席寶座，欲挑戰現任主席蘇西智。上水鄉事委員會主席侯志強亦不甘寂寞，似乎有意加入戰事。建仔今次不但要平息內亂，仲要提防鄉紳漁人得利喎。

由於蘇西智年事已高，再連任主席四年就年過七十，加上區選一役反映新舊交替呼聲亦高，建仔屬意畀今屆自動當選嘅劉國勳一試，但蘇西智就遲遲唔肯交棒。

我哋問過兩位當事人，蘇西智聲稱同建仔仲未溝通過，但劉國勳就話建仔研究緊點樣從內部換血、經驗傳承之間取得平衡，會以北區今後發展為大前提，睇嚟好戲仍喺後頭。

但手握至少四票嘅鄉事派似乎不甘寂寞。侯志強回應我哋查詢時，意有所指咁講古仔，話有「大黨」自己做阿頭，掟舊豬頭骨出嚟畀「鄉下仔」搶，咁咪即係要鄉下仔打交爭豬頭骨？佢接住話鄉下有個傻佬唔知死，與其爭食豬頭骨，不如索性爭做阿頭好過。雖然侯志強冇講到明會加入戰局，但係就呼之欲出囉！佢寸完建仔後，就表明自己只係想「耕田」喎。

料泛民坐埋一邊食花生

建仔手握八票，咁鄉紳點樣說服工聯會、泛民等乖乖地交票？侯志強話好多變數，「話唔定一個半個唔歸隊呢？」話中有話，唔知講緊邊個？但我哋問過部分泛民，佢哋都異口同聲話，區選至今從來冇任何疑似候選人向佢哋拉票或者打招呼。北區始終係建制派天下，今次建仔同鄉紳之間惡鬥，相信手持四票嘅泛民都係坐埋一邊食花生算嘞！

第一手消息請下載on.cc東網iPhone/iPad/Android/Windows Phone Apps