政壇：保監局任命無驚喜

公職王多瓣數

現時負責監管保險公司嘅係屬於政府部門嘅保險業監理處（保監處），保監局成立後，明年底將取代保監處，並會以兩至三年時間接管負責監管保險中介人嘅三個自律規管機構。香港保險業不時傳出呃騙事件，新成立保監局當然係好事。

但新委任嘅主席又係鄭慕智，確係令人冇晒驚喜。鄭慕智公職百足咁多爪，無論係教育、地產或金融都有佢份，高峰時更曾同時擔任七項公職，被質疑違反不能同時擔任六份公職嘅原則，此外，佢亦都擔任唔少上市公司董事。今次佢再下一城，難免令人諗起無人願意幫政府做事，而鄭慕智如何分配時間，相信都係一大問題。

另有七名非執行董事獲委任，當中唔少熟悉嘅面孔，而且至少四人非首次被委任公職，例如陳家殷係消費者委員會現任成員，兼消費者訴訟基金管理委員會主席，馬豪輝曾擔任過地產代理監管區紀律委員會主席，亦都係現任旅遊業議會獨立理事，而張鳳婷則曾任旅遊發展策劃及發展委員會成員。

另一熟悉面孔就係郭振華，佢喺剛過去嘅區議會選舉中放棄競爭連任，意味着將失去區議會主席嘅頭銜，但佢唔怕冇咗政治舞台，事關八月份佢已被委任為回收基金諮詢委員會主席，依家又因本身係保險從業員，所以獲委任為保監局非執董。咁都算合理嘅，希望佢為保監局提供行業意見喇！