浴室天花塌石屎，住戶險「中頭獎」！有油塘邨居民早前使用洗手間時，突然有一塊九吋長的石屎連同鋼筋從天花跌下，險被擊中，在閃避時更將眼鏡撞裂，事主向房署反映後，未獲即時處理，不滿部門處事敷衍。區議員指該屋邨正進行「全方位維修」計劃，認為事件反映檢測計劃有漏洞，未能有效找出單位結構的潛在危險，建議房署徹底檢查樓宇，保障居民安全。記者：黃凱翎、陳瑋珩

房署職員事後作全面檢查，發現浴室淋浴處的天花及牆壁都需作修補。（讀者提供）

陳先生的浴室天花突然有一塊石屎連同鋼筋跌下，幸及時閃避而未有受傷。

石屎跌落時疑衝力過猛，碎石四散。

陳先生閃避時撞裂眼鏡。

掛在牆壁的玉佩亦被石屎撞至斷成兩塊。

「去去吓廁所突然天花跌咗一大嚿石屎落嚟，仲有好多碎石散開，真係差少少就跌落我個頭度！」油塘邨居民陳先生指十二月二十二日在浴室如廁時，近洗手盆天花有石屎連同鋼筋從天花塌下，如月餅罐般大，故衝力甚猛，跌落時先撞向牆壁，然後撞向膠盆反彈至地面，導致碎石四散。

「師傅得閒上嚟整」

陳憶述事件仍猶有餘悸，「我掛喺牆嘅玉佩斷開兩截，眼鏡又因為我彈開嗰陣撞裂咗，如果我冇即時彈開，一定頭破血流兼破相！」陳事後聯絡辦事處，職員到場時稱「冇結構危險，師傅得閒會上嚟整」，陳對於職員未有積極協助，極感不滿，「得閒先上嚟整，都唔知會唔會跌多幾塊落嚟！」

陳續指，九月曾有房署技工上門檢查單位，但僅檢視鋁窗，「既然派咗人上嚟睇窗，點解唔做個全面結構檢查？嗰時廁所天花已經有油漆剝落，如果檢查晒全屋，可能唔會發生呢件事！」記者到上址實地視察時，發現浴室地面滿布碎石。

房署發言人表示，該邨辦事處首次接獲有關投訴後，已即時派員實地檢查，並已安排十二月二十四日上午進行維修。

「房署九月先為榮塘樓嘅單位做完檢查，點知過咗三個月就出事，根本就係睇漏眼！」觀塘區議會房屋事務委員會委員謝淑珍表示，房署近年積極推行「全方位維修」計劃，其中榮塘樓的檢查剛於今年七月展開，認為事件反映檢測計劃出現漏洞，未能有效找出單位結構的潛在危險，建議房署盡快修正。