古人教落，名不正則言不順，言不順則事不成。嗱，有辦你睇，港府就退休保障推出諮詢，對所謂「不論貧富」方案一早落閘，而所謂「有經濟需要」方案就將申請資產上限定喺區區八萬蚊水平，其實只不過係另類綜援，擺明貨不對辦，「全民退保」就冇嘞，「全民鬧爆」就有份！

可能見群情洶湧啩，綽號「肥仔張」嘅勞工及福利局局長張建宗尋日出席公眾論壇解畫補鑊，強調港府尊重長者，重視長者，又話八萬蚊嘅資產限額只係假設，目的係引發社會討論同比較，呢條唔係政府底線，日後有調整空間咁話。

唔係啩，確保長者老有所養係政府嘅基本責任，你估去街市買菜討價還價咩。再講，就算落地還錢，唔該都畀番些少誠意吖。早排有工會計過數，今時今日身後事閒閒哋都要使廿幾萬喇，政府將退保門檻限喺八萬蚊，仲有冇再無良啲吖。好明顯，即使港府「皇恩浩蕩」，將資產上限增加一倍，都係無補於事，唔通真係要等老人家連棺材本都使乾使淨，淪為無產階級，政府至肯喺手指罅施捨畀佢哋？

冇計喇，針唔拮到肉唔知痛。港府將學者建議嘅「全民老年金」改名為「不論貧富」方案，聲言會提前耗盡財政儲備，需要大幅加稅，一味靠嚇，固然係孤寒財主性格使然，更重要嘅係，高官一個二個高薪厚祿，根本無後顧之憂，點會理解普羅市民退休後嘅困境吖。好似官到無求膽自大嘅政務司司長林鄭月娥咁，唔知係咪身為教徒，一早就喺天堂book定位，畀記者兜口兜面問棺材幾錢一副，當堂口啞啞，食飯唔知米貴，買板唔知價錢，都算不食人間煙火咯。至於啱啱夠鐘攞長者卡嘅肥仔張，更加係問責高官裏面嘅樓王，自己富到流油，對搵朝唔得晚嘅打工仔斤斤計較，難為佢仲好意思話「尊重長者，重視長者」，唔怪得畀人噓，畀人圍啦，呢啲咪自取其辱囉！

嗱，咪畀人睇死，港府力谷「有經濟需要」退保方案，其實係進可攻退可守嘅兩手牌策略。市民收貨固然最好，反正政府負擔有限，符合善財難捨嘅守財奴哲學；爭議太大則正中下懷，到時候一句社會冇共識，拉倒了事可也。

始終都係嗰句，「泥水佬開門口，過得自己過得人」。官老爺如果將心比己，設身處地諗吓臨老唔過得世嗰種淒涼折墮，就唔會咁口響嘅嘞，叮！