唔少名人趁住尋日係今年最後一個賽馬日，入沙田馬場碰吓運氣兼湊熱鬧。在場見到立法會議員Ben陳恒鑌同助理Fanny，唔知係咪因為好友立法會漁農界議員「高佬賢」何俊賢近日被人以匿名信投訴「包養」助理，阿Ben一見到記者即煞有介事強調呢位係佢助理，又拒絕同Fanny單獨合照，可能係費事瓜田李下喇！

陳恒鑌（左一）同女助理Fanny（左二）遊馬場，兩人好合拍。

王賢訊（左）與太太朱穎詩聖誕冇得去玩。

蒙德揚採取居安思危政策應付淡市。

但阿Ben同Fanny一落到沙圈後，兩人就大方同人哋合照，似乎對相機又唔係咁抗拒，期間同仁濟醫院副主席Vincent王賢訊夫婦等人有講有笑，皆因Fanny同王賢訊太太Vincci朱穎詩就讀同一間中學，係師姐師妹，唔怪得特別啱傾喇！

蒙德揚居安思危

Vincci腹大便便，佢話BB大約過多百幾日就會出世，預產期係明年四月。不過Vincent就搞笑反駁話唔止百幾日喎！今個聖誕假期因為Vincci要安心養胎，加上擔心有恐怖襲擊，所以冇去旅行，惟有等BB出世後，睇吓係咪去新加坡玩，因為Vincci曾經喺新加坡工作，非常喜歡當地美食。

同場仲有身形一次弗過一次嘅信興集團主席兼行政總裁David蒙德揚，年尾又係跑季，熱愛跑步嘅David話，嚟緊會參加兩個馬拉松賽事。對於來年市道，佢就唔太樂觀，但若及早部署就可以減低損失。好似今年內地客減少，佢哋就採取居安思危政策，擴大本土生意，總之見步行步喇！

第一手消息請下載on.cc東網iPhone/iPad/Android/Windows Phone Apps