政壇：王庭聰細女出閣喜成雙

身兼香港工商總會主席嘅南旋集團主席王庭聰，繼舊年年頭大女出嫁後，尋日輪到細女王麗盈出閣，嫁畀拍拖十二年嘅文宇軒。對三個仔女先後成家，王庭聰自然好開心，大仔王槐裕仲預計下月再為家族添丁，可謂喜事成雙。

王庭聰（中）細女王麗盈（左）及文宇軒擺酒結婚。

尋晚王庭聰喺灣仔會展筵開一百五十席宴客，出席嘉賓眾多，包括勞工及福利局局長張建宗、發展局局長陳茂波等多名高官同政商界猛人。新郎文宇軒致詞時感激太太王麗盈處處為佢着想，縱使兩人有小摩擦，但都一直支持佢，聽到新娘感動落淚，氣氛好溫馨。

記得王庭聰大仔同大女結婚時，都將禮金捐畀慈善機構，今次細女結婚亦唔例外。王庭聰話收到嘅頭一百萬元禮金將捐畀國際小母牛香港分會，若超過一百萬元後或再決定餘數捐畀其他慈善機構，與他人分享喜悅。