政壇：波波撈過界探傷健義工

發展局局長「波波」陳茂波逢周日都會發表網誌，大部分時間都係解說局內政策，甚至反駁外界嘅批評質疑，但喺聖誕節後發表嘅首篇網誌，佢透露為響應佳節，平安夜當日去咗探「路向四肢傷殘人士協會」嘅一班義工，聽咗唔少感人故事。最近勞工及福利局局長張建宗頻頻四出為退休保障諮詢文件解畫，唔通波波想為張建宗分擔吓關顧有需要人士嘅工作？

波波喺最新網誌話，協會好多人都係因為意外造成四肢傷殘，有啲甚至係嚴重癱瘓，一度需要喺醫院依靠呼吸機維持生命，但令人感動嘅係佢哋堅強勇敢咁生活，透過努力訓練，改善自己嘅活動能力，適應新嘅身體狀況，又學識利用輔助儀器做一啲更複雜嘅事，例如用電腦、打字同繪畫等。

此外，佢哋仲積極參與義工工作，好似去醫院探訪一啲同佢哋有類似遭遇嘅傷者，以過來人經驗鼓勵，開導佢哋積極勇敢面對人生，將正能量如漣漪般散播開去。波波建議多啲主動留意同關懷身邊嘅家人同朋友，遭遇逆境時應該主動搵人傾訴，所謂「辦法總比困難多」喎。