政壇：搞搞政：鬍鬚曾吹本土 林煥光唱反調
由於近年本土意識抬頭，連「本土」兩字都變得好敏感，但財爺「鬍鬚曾」曾俊華竟主動撩呢個具爭議性嘅話題。聖誕閉關撰寫預算案嘅鬍鬚曾，唔知係咪冇街去，悶得滯，尋日發表網誌時諗番佢任教喇沙書院劍擊隊三十年，多年嚟同拔萃男書院競爭激烈，每當置身舊生圈子，無論係叫口號或唱校歌，都令佢覺得喇沙仔對學校嗰種近乎狂熱嘅歸屬感，同近年流行嘅所謂「本土」意識有唔少共通之處。
佢進一步解釋話，兩者都係對本身身份、傳統同文化有強烈嘅感情同自豪感。佢認為呢種感情同自豪感，可轉化為一種正面嘅動力，推動每一代喇沙仔願意為母校作出無私貢獻。而呢種感情同自豪感，同時存在喺所有香港人之中，對香港深厚嘅情感，同樣可團結成一股正面、具建設性嘅力量，推動香港變得更好，讓香港整體都能夠得益，而絕對不止於一種封閉式、消極，甚至係具破壞性嘅保護主義。
但佢呢種講法，就同特首梁振英年初譴責本土派搞「光復行動」衝擊內地人嘅語調截然不同。行政會議召集人WK林煥光尋日出席活動時，一開始仲為鬍鬚曾解畫，認為佢只係有幽默感同感情，講緊嘅「本土」係對學校、球隊、社區以至城市嘅歸屬感。但WK話鋒一轉，就表明立場唔支持年輕人過分本土。佢話香港人以務實為主，少部分人嘅極端思想唔值得鼓勵，大部分人唔會接受勇武抗爭，擺事實講道理先可解決矛盾，否則只會原地踏步。
WK似乎係同鬍鬚曾唱反調外，政府中人亦幫鬍鬚曾補鑊，強調佢唔係支持勇武派或趕遊客嗰班本土派。
