政壇：民協楊振宇 謀戰超選
立法會「超級」議員KK馮檢基喺上月區議會換屆選舉落敗，唔止失去明年立會超級議席嘅入場券，仲牽一髮動全身，影響埋立會選舉嘅部署，事關KK早前表明民協唔會放棄超級議席，仲話黨內已有中生代同新生代有意出選，據知有意角逐超級議席嘅係九龍城區議員、民協秘書長楊振宇，而黃大仙候任區議員施德來亦爭取喺地區直選一試身手。
資源所限出選爭崩頭
區選一役，民協多個受到力捧嘅中生代，好似資深區議員任國棟、莫嘉嫻等紛紛落選，令佢哋派資深議員出戰超級議席嘅選擇減少，惟民協內部仲覺得唔可以讓出超級議席，所以有人建議派資歷較淺嘅成員應戰，其中楊振宇係可能人選之一。
政圈分析指楊振宇想「升呢」循超級議席出選，其實唔令人意外，事關一二年僅以四千票之差落敗無緣進入立會嘅民協副主席譚國僑，繼區選換屆選舉成功重返深水埗區議會，下一步好大機會再下一城，力爭喺九龍西名單再次排第一出選。另一名擬「升呢」新生代，係社工出身嘅施德來，佢喺區選成功跑出，成為黃大仙候任區議員，有指順理成章可以爭取喺九龍東直選出戰。
至於民協內知名度最高嘅KK，佢早前話明年立會選舉最多會派四人出選，但有民協中人爆料，基於資源所限，民協最多只可以支持三張名單出選，換言之如譚國僑同KK齊齊披甲上陣，中生代或新生代只有一個名額出選，究竟呢個安排係咪可以回應社會世代交替嘅強烈呼聲？明年選戰結果自有分曉。
