正所謂，做人難，做香港人更難，做天水圍人難上加難。天水圍有名叫「悲情城市」，基層市民本已生活艱難，加上市政配套天殘地缺，連公共街市都欠奉，買餸仲貴過市區，有乜法子唔悲情吖。

即係咁，天水圍規劃失當，設施不足，街市基本上由領展壟斷，最弊係領展唯利是圖，計劃將天耀街市改建為商場，令街市買少見少。正如關注組織話齋，區內逾半居民曾經光顧過天耀街市，關閉街市將嚴重影響日常生活，難怪有居民趁聖誕節「報哀音」，而唔係「報佳音」喇。

話時話，天水圍物價之高，早就出晒名。曾經有調查指出，天水圍街市嘅平均物價唔止貴過屯門及元朗，甚至比全港最富裕嘅灣仔區高出一大橛，連買隻雞蛋都貴兩成四，居民被迫捱貴餸，簡直冇啖好食。點解會咁？答案好明顯，咪就係因為市政設施不足，街市畀財團壟斷囉。

仲有吖，如果領展取消天耀街市，居民可能要焗住幫襯天盛街市，問題係呢個街市唔止柴米油鹽樣樣貴，而且食材「離地」，居然大賣凍蟹、和牛、吉品鮑、西冷牛扒等高級食材，試問幾多基層市民負擔得起呢？正如有居民話齋，拆咗天耀街市，寧願改去元朗購物都唔幫襯天盛街市，一於「餓死」領展。

講係咁講，領展財雄勢大，點會咁易餓死吖。大家有眼見，近年領展不斷瘋狂加租，逼走小商戶，然後引入連鎖店，導致商場千篇一律，毫無特色可言。最慘係羊毛出自羊身上，商戶將加租成本轉嫁畀消費者，搞到基層市民冇啖好食。其實，天水圍居民嘅要求好簡單，只係希望增設街市，引入競爭，物價自然有下調空間，點知連咁卑微嘅要求都達唔到，講起真係可悲。

講開又講，天水圍幾乎百無，除咗欠缺街市，醫院、休閒等公共設施亦嚴重缺乏。最好笑嘅係，當局年前搞咗個「天秀墟」，話就話為區內弱勢社群提供自力更生機會，點知眼高手低，搞到「天秀墟」不倫不類，唔湯唔水，開業後門堪羅雀，商戶拍晒烏蠅，簡直係愈窮愈見鬼。

始終都係呢句，民生無小事。一個完善嘅新市鎮應該有各項配套設施，滿足居民生活所需，而唔係好似天水圍咁，居民只能自生自滅，望天打卦。所以話，港產官僚絕對係製造悲情嘅罪魁禍首，叮！