城中鏡：「叫個孫做晒囉」
廣東社團總會、福建社團聯會同香港華僑華人總會三個社團青委，早前首次舉行聖誕聯歡。在場見到廣東社團總會青委主任Victor林凱章同副主任丁志威好好傾，原來Victor係安老事務委員會成員，而身兼黃大仙區議員嘅丁志威，其選區內嘅長者眾多，兩人梗係好啱傾啦！講開安老，Victor仲大爆有「變形金剛之父」稱號嘅爺爺林亮養生之道，引起眾人爆笑。
陳昆（左起）、林凱章、林智彬首次聯手搞聖誕聯歡，霍啟山都去輕鬆吓。
王紹恆（左）大方承認同女友林靜好事近。
丁志威所屬選區內長者眾多，相信佢對服務長者好有心得。
乜嘢事咁好笑呢？事關林亮已經九十一歲高齡，問Victor有冇趁機問吓爺爺需要乜嘢安老服務，以便為政府獻策？Victor就好淡定話：「佢仲好後生！」咁又係，林亮好精靈，年輕過好多後生仔。唔知佢有乜嘢養生秘笈呢？點知Victor諗都唔使諗，笑笑口爆料話：「咪叫個孫做晒（工作）囉！」真係識講笑。
霍啟山陪球迷度除夕
福建社團聯會青委主任林智彬同華僑華人總會青委主席Penny陳昆都有到場，未開席，Penny塊面已經紅晒，唔講仲以為佢飲大咗。Penny笑笑口解釋，啱啱同太太去咗馬爾代夫玩，所以曬成咁囉。
香港足球總會董事霍啟山都有到場，啟山話最近忙於處理除夕夜喺香港舉行嘅省港盃足球賽，當晚原本要同家人食飯，但睇嚟要喺球場同球迷一齊過喇！廣東社團總會前主席王國強細仔Rex王紹恆同女友林靜拍拖到場，問Rex幾時好事近，佢大方話計劃緊喎。
