政壇：鄺美雲生日 老友驚喜助興

鄺美雲喺前日、即係平安夜慶祝五十三歲生日，過往年年都會搞生日派對慶祝，但今年佢想低調，唔準備慶祝，結果反而身邊嘅朋友「唔習慣」，一直預備平安夜直闖佢家門，當日出席嘅有藝人周麗淇、時裝設計師何國鉦、C All Star嘅釗峰同巨星幫謝東閔，視鄺美雲為家姐嘅何國鉦直言：「年年平安夜都留畀家姐，佢覺得搞生日好攰，一路話唔搞，但都驚佢突然搞，所以都唔敢約人，最主要係就算唔慶祝生日，都好自然會去佢屋企聚會，最後大家都訂咗大蛋糕，嗰日食飯唱歌，都好開心。」