政壇：消委會獻計 數據滾存吸客
港人對流動數據用量需求極大，但係手機月費計劃嘅剩餘數據用量須「月月清」，只有個別電訊商容許客戶保留剩餘數據用量，但須額外收費。消費者委員會總幹事黃鳳嫺指港人不時會旅行或者出差，建議電訊商提供免費數據用量滾存計劃，有助吸引更多客戶，維持長遠利益。
黃鳳嫺建議電訊商提供免費數據用量滾存計劃，有助吸引更多客戶。 （資料圖片）
根據通訊事務管理局辦公室嘅數據顯示，每名港人每月平均數據用量由○九年嘅127MB上升至今年九月嘅1.3GB，增幅達十倍。而內地三間電訊商今年十月一日起實行「流量不清零」方案，即當月剩餘數據用量可自動保留到下月底前使用，兼且唔收取任何費用。本港電訊商香港流動通訊（csl）上月亦推出類似服務，惟每月須另外收費四十八元，仲係只適用高用量客戶同唔能夠作為買機上台嘅指定增值服務添！
黃鳳嫺認為本港電訊商可參考內地嘅做法，因港人不時會旅行或出差，若電訊商提供免費數據用量滾存計劃，有助吸引更多客戶，維持長遠利益。不過，有市場學者指額外數據收費係電訊商收入來源之一，電訊商唔會輕易讓步，自斷收入來源。
