政壇：薛芷倫過聖誕 首揀家人朋友
前晚平安夜，唔少名人明星盛裝出巡慶祝佳節，名媛Fanny薛芷倫喺晚上九時多現身有份投資嘅餐廳，同友人晚膳。一身紫紅色節日打扮嘅佢，透露啱啱與子女聚會，稍後會再到友人家中開party。
一身紫紅色打扮嘅薛芷倫話同仔女聚會後，會再到友人家中開派對。
單拖現身嘅Fanny被問到可有男伴陪同？佢笑住話：「今晚冇，我唔會臨急抱佛腳搵嘅，平時都可以搵。都有男士約我，不過佢哋好暗示形式，例如問你聖誕有冇嘢做？有冇約人咁？唔會直接話約你，但我都拒絕咗，話再約，因為覺得聖誕應該同家人朋友過。」
佢又話自己已單身多年，身心早已變得獨立，當然亦都希望緣分到來，而自己亦相信可以搵到。問到可會覺得時下嘅男士太過細膽？佢話：「可能佢哋驚我拒絕啩，又或者依家都有好多選擇，約唔到A咪約B囉！」
