政壇：陳家洛着穿窿襪 家訪覺得好樣衰
今日就係「拆禮物日」，係咪等得好心急呢？但係立法會議員陳家洛一早就爆響口，話今年想要襪做聖誕禮物，仲叫咗老婆幫佢預備一啲靚靚嘅襪，可以襯番啲衫，唔知最後佢老婆係咪真係買襪畀佢呢？至於點解想要襪，陳家洛就解釋，因為着住穿窿襪落區會唔方便，做家訪時如果要除鞋入屋嘅話，咁啱隻襪穿咗個窿就會顯得好樣衰。仲以為佢會因為童心未泯要聖誕禮「襪」，原來係怕樣衰。
陳家洛（左）早已預備聖誕禮物畀家人，佢囝囝道明大豐收。（互聯網圖片）
講起佢個仔，陳家洛話依家啲細路好難呃，仲自爆話咪睇佢個仔道明只得三歲，已經唔信啲禮物係聖誕老人送嘅，所以囝囝唔會擺聖誕襪喺床頭等收禮物。話雖如此，佢都仲會預備禮物氹吓老婆仔女嘅，就算聖誕假要改卷冇得去旅行，都仲可以收禮物感受吓節日氣氛。不過，佢有成五個仔女，要滿足佢哋需要之餘，又要擔心仔女會唔會為禮物爭風呷醋，唔知佢買禮物使唔使左諗右諗呢？
