政壇：搞搞政：委任制取消 區會多暗湧
雖然區議會委任制壽終正寢，但就牽一髮動全身，令新一屆區會衍生出唔少問題，隨時倒瀉籮蟹，唔知會唔會煩到同區議會有緊密合作嘅民政事務總署署長陳甘美華呢？
好似議席較多嘅地區如屯門、沙田及葵青，因有多名資深區議員落選，有地區人士擔心新舊交替會影響區會議事功能。事關新一屆區會冇委任區議員，加上好多新人唔熟悉議事規則，預計最初開會時要花時間解釋議事規則，尤其係遇上「傘兵」，相信要花更多唇舌。至於區會嘅專責委員會亦可能有變動，包括增加、減少或合併，主要視乎地區議席嘅增減。
建制難包攬委會主席
早前有傳政府下令要建制派包攬十八區正、副主席之位，聽聞政府連區會轄下的小組委員會都唔放過。但委任制取消後，建制派都覺得分身乏術，就以中西區及離島區為例，中西區只有十五個議席，但轄下有多個委員會同工作小組；而離島區表面上有十八個議席，但其實有八個都係嚟自鄉事委員會嘅當然議員，加上以往經常主持大局嘅副主席周轉香已交棒，相信未來需要重新協調，所以很難迎合政府要求。
據悉，有人建議政府反其道而行，即係將部分委員會主席讓畀泛民主派。有建制派人士透露，中西區嘅建制陣營已達共識，唔會搶盡所有委員會嘅正、副主席位，反而讓出一啲較重要嘅委員會畀泛民。該區嘅白鴿黨激進「乳鴿」許智峯，曾就撥款予地區團體推廣基本法一事喺區議會抗議，最後要由保安員抬走。建制派分析指出，如果日後由許智峯擔任地區設施管理委員會主席，「最好就乜都唔批，等啲地區設施殘殘舊舊，睇吓佢點同市民交代！」
