政壇：郭琳廣被寸監警難做
獨立監察警方處理投訴委員會（監警會）委員通常兩年一屆，一般會做足三屆，即係六年，但做咗兩屆嘅委員鄭承隆就突然「被分手」，任期到本月三十一日除夕夜就完結。據聞鄭承隆私下同朋友講，自己都好想做落去，對於出師未捷都覺得好無奈。佢尋日出席電台節目訪問時，就寸爆監警會主席郭琳廣本身係廣西政協，予人感覺唔舒服，很難繼續做得好。
鄭邀舊戰友入新思維
鄭承隆尋日被電台節目主持人問及，佢同兩屆監警會主席共事過，兩名主席有乜分別？佢就明寸現任主席郭琳廣：「我哋（監警會）要盡量做到公平，都要畀人睇到公道，市民要求要畀人感覺好公正嘅人先得，我唔係話郭主席唔公道，而係佢本身背景（廣西政協）嘅問題，佢一落嚟坐嗰陣，已畀人感覺唔舒服，好難繼續做得好落去。」
佢話最難忘係處理佔領行動（佔中）嘅投訴，事關以前未有佔中，一星期只睇十多小時文件，但佔中之後，一星期要睇四十小時文件，認真唔易做。佢又話監警會喺處理前警司朱經緯涉毆打市民一案，確實做咗好多工作，相信結果已令公眾感滿意。不過，佢指現時警民關係的確較以前緊張，如果政府做好本分，令市民減少遊行，相信可減少警民衝突。
正所謂一道門關上，另一道門打開，原來鄭承隆前日已經正式加入由白鴿黨前黨員狄志遠同黃成智等人組成嘅新思維，自稱由建制派走出來，而狄、黃則嚟自泛民主派，若要走一條中間路線，唔能夠只選擇支持或反對。佢又話會邀請合作過嘅舊戰友一起加入新思維，仲大賣廣告，指新思維下月七號就會舉行就職禮；至於會唔會出戰立法會新界東補選，則有待內部商討。
