廣東話有句歇後語「阿茂整餅，冇嗰樣整嗰樣」，意思係無中生有、畫蛇添足咁解。好似房屋協會咁吖，懶有創意咁推出「富貴長者屋」項目，結果反應冷淡，弄巧成拙，呢啲咪就係阿茂整餅囉。

話說房協首個非資助富貴長者屋北角「雋悅」前日截止申請，計計埋埋僅收到三百九十三份申請表，不及推出單位總數嘅七成，即係話仲有近二百個單位無人吼。咁就奇嘞，家陣房屋問題嚴重，無殼蝸牛已到咗一屋難求嘅地步，搞到劏房遍地開花，連豬欄改建嘅居所都有大把人住，點解富貴長者屋反而冷冷清清呢？答案其實好簡單，皆因錢作怪。

顧名思義，富貴長者屋只為有錢人而設，首個項目共有近六百個單位，實用面積三百四十幾至一千二百幾平方呎，只租不賣，租住權費按申請人年齡遞減，以最年輕六十歲人士租住最大單位計算，租住權費近二千萬元，住客每月仲要支付八百元服務費及每呎四元一毫嘅管理費。試諗吓，究竟有幾多長者負擔得起呢？

正如有人話齋，富貴長者屋計劃反應較預期冷淡，表示冇太大市場，有能力繳付一千幾百萬元租住權費嘅長者，不如買新樓好過。再講喇，絕大多數富貴長者早就擁有自己物業，根本唔需要租住長者屋。房協話就話相關計劃唔係地產項目，唔係志在賺錢，弊在租住權費隨時仲貴過半山豪宅租金，完全冇吸引力可言，反應唔冷淡至奇。

冇錯，外國亦有類似嘅房屋項目，主要針對有經濟能力嘅退休長者，但不可不知，一處鄉村一處例，外國行得通唔表示香港亦行得通。中國人嘅傳統觀念係百年歸老後將物業等資產留畀後人，而富貴長者屋只租不賣，而且收費昂貴，就算長者經濟能力冇問題，都要諗過度過喇，何況唔係咁多人負擔得起嘅咋。

正所謂，好鋼用喺刀刃上。香港土地資源嚴重缺乏，港府覓地建屋困難重重，搞到要「盲搶地」咁滯，而房協居然將珍貴嘅土地用來興建富貴長者屋，你話係咪本末倒置、輕重不分吖？老實講，有經濟能力嘅長者根本冇居住方面嘅問題，亦唔使擔心退休生活，房協與其越俎代庖，不如諗辦法興建多啲公營房屋仲好喇。呢，公屋輪候冊申請人數就快突破三十萬大關，家陣最緊要係加快興建公屋，而唔係富貴長者屋吖，叮！