城中鏡：王嘉恩飯局多 飲定活乳酸

香港國術總會會長Albert王嘉恩前日同會員提早食飯慶祝聖誕，包咗私房菜大食一餐，Albert話踏入十二月已出席咗三個飯局派對，未來仲有三個飯局，笑言要飲定活乳酸幫助消化。提到今年係香港國術總會成立第二周年，佢開心咁話：「上個禮拜三（十六日）我哋個會攞到《葉問3》一場4DX優先場，畀我哋做慈善首映，真係好開心，因為部戲講詠春，同我哋個會好夾，同黃百鳴一拍即合，雖然慈善籌款籌得嘅錢唔多，但對我哋嚟講意義重大，嗰日嚟首映嘅全部係大師傅，好似大聖劈掛陳秀中師傅、詠春師傅江志強都有嚟，幫我哋個會省靚招牌。」