政壇：版權法雞精班 泛民獻醜
多名反對《2014版權（修訂）條例草案》嘅泛民立法會議員，被揭對草案內容根本認識不深，部分人更曾中途退出草案審議委員會。為加深同僚對有關問題的認識，工黨議員何秀蘭尋日下晝邀請咗身兼美國德克薩斯A&M大學法學院教授嘅法律與知識產權中心聯合主任余家明，到立會舉辦版權法「雞精班」，講解香港同歐美嘅版權法律最新發展，有多名泛民議員或其助理出席。期間部分泛民議員喺發問時「獻醜」，自揭對現今網絡世界完全脫節，令人質疑佢哋係純粹為咗政治原因而反對草案。
版權法專家余家明（右一）耐心向泛民議員講解版權問題ABC。
例如喺談及「串流」平台嘅侵權問題時，工黨張超雄即舉手，話唔知道免費音樂串流平台Spotify係乜嘢？喺談及image response，即以截圖來代替以文字方式表達意見係咪構成侵權時，白鴿黨劉慧卿亦話唔明白，要余教授詳加解釋。
何秀蘭會後自爆，花咗唔少時間上網學習網絡「潮語」，依家終於明白「串流打機」即等於「師奶睇人打麻雀」，「公園阿伯睇人捉棋」。喺泛民拉布下，版權修訂條例估計還要審議好一段時間，各黨派議員應該仲有大把時間補課。
