政壇：基金教父 佳節靚茶義賣

原來受太太多年做義工感染，最近佢都做埋一份，幫啲基層中學生補習英文；佢仲趁聖誕佳節捐出千年古樹普洱茶餅義賣，幫香港學生輔助會「兒童發展基金」籌款。

雷賢達畀咗疊基層學生作文出嚟睇，話啲同學仔好有理想，想做飛機師、律師咁。佢教啲同學仔朗讀英文同睇國際性英文報刊，希望幫佢哋增廣見聞，等佢哋個個好似美國總統奧巴馬咁有自信。依家每星期有六至十二個同學仔去佢屋企，跟佢同太太補習英文，佢太太仲好叻教小朋友做麵粉花添！

佢又戥依家啲香港學生慘，經常畀人「死谷」做功課，玩都無得玩，仲搞到無晒興趣睇書。佢話自己七十年代留學時，寄宿學校每日有兩粒鐘遊戲時間可以踢波同High Tea，啲學校好重視全人發展，所以好多投行都鍾意請外國畢業生。