政壇：搞搞政：泛民唔撐元旦遊行 本土挑機另起爐灶
民間人權陣線今年決定停辦元旦遊行，民陣方面解釋因今年冇政治議題所致。消息指民陣就元旦遊行一事分別喺十月同十二月舉行過兩次投票，兩次都因不獲多數支持而否決，與會嘅政團認為舊年遊行人數太少，再舉辦是示弱；亦有人指剛完成區議會選舉，希望好好休息；更加有團體覺得每次遊行都被本土派針對，實在「搞唔過」。泛民大佬諸多不滿，在多數服從少數的情況下，遊行最終擱置。
本來係咪舉辦元旦遊行只係小事，但當民陣決定停辦之後，本身屬於民陣成員嘅保衞香港自由聯盟召集人韓連山竟然另起爐灶，牽頭舉辦另一遊行，反映民陣內部都有唔少矛盾。韓連山話唔同意民陣指「無議題」就擱置遊行，反而覺得面對版權修訂條例、全民退休保障等議題，遊行係「非搞不可」。佢話目前已有二十六個團體聯署參與，包括以立法會議員范國威為首嘅新民主同盟、社民連同由「滑鼠娘娘」鄺頌晴做發言人嘅鍵盤戰線等，尋晚已召開第一次籌備會議。
明年立會選舉見真章
有人就覺得，今次元旦遊行係激進派同本土派向傳統泛民嘅一次示威，當傳統泛民表明唔舉辦元旦遊行，激進勢力就聯合其他人另起爐灶，經此一役，相信兩派之間嘅鴻溝又會進一步擴大，但到底邊一派能夠獲得市民支持，明年立法會選舉就會見真章。
