政壇：人力亂噏攪喎香港
明年初就會發表新一年度嘅施政報告，各政黨呢排輪流就施政報告向特首CY梁振英提交建議。人民力量兩名立法會議員「大舊」陳偉業同「慢必」陳志全就講到明唔會見CY，反而向政務司同財政司兩位司長提意見。大舊同慢必一如以往提出多項建議，包括建議政府向市民派一萬元，以及要求透過普選形式去產生新一屆特首同立法會議席。不過，今次佢哋有新猷，建議政府搬走香港國際機場同葵涌貨櫃碼頭，用嚟發展新市鎮同工商業住宅用地，咁香港咪反轉咁滯？
大舊話機場搬走之後，所得土地仲可以改建成容納六十萬至八十萬人口嘅新市鎮，除咗可以增加土地同房屋供應，佢仲認為此舉比起興建機場第三跑道更符合經濟效益。咁機場同貨櫃碼頭應該搬去邊？佢就話要等顧問去研究，都係得個講字。其實早前都有研究認為要開發郊野公園，以及拆卸高爾夫球場改作房屋用途，對比起搬遷機場同貨櫃碼頭，開闢郊野公園同高爾夫球場嘅土地面積相對無咁大。
慢必抗爭續拉布
之不過，貨櫃碼頭及機場係香港運輸同物流業嘅大本營，好難話搬就搬喎。換言之，人民力量嘅建議唔止係不可能的任務，簡直就係妙想天開。如果香港要落實佢哋嘅建議先至搵到土地，相信未起好住宅之前，已經天下大亂。
另外，慢必有講到未來嘅抗爭大計，佢話會盡做，繼續拉布，但都要睇各黨派嘅參與程度，希望有更多泛民議員一齊參與拉布。
