聖誕臨近，一年將盡，有機構邀請兩岸民眾票選年度漢字，結果「和」字眾望所歸。咁又係吖，世局亂如麻，幾時都係以和為貴好啲，特別係香港，家嘈屋閉，無日安寧，如果年度漢字係「和」字，咁年度歌曲就肯定非約翰連儂嘅《給和平一個機會》莫屬嘞。

嗱，聽吓本港兩大宗教領袖點講喇。天主教香港教區主教湯漢尋日發表聖誕賀詞，慨嘆喺經歷連串爭拗、矛盾同社會撕裂後，家庭作為整體社會核心價值亦受到挑戰，希望大家趁住聖誕佳節抽時間陪屋企人。聖公會大主教鄺保羅聖誕文告亦指出，本港喺佔領運動以及政改爭拗後，已經變得撕裂分化，人與人之間缺乏互信包容，呼籲以愛同生命戰勝仇恨咁話。

正所謂家和萬事興，家衰口不停，社會大環境紛紛擾擾，家庭生活都唔慌和諧得去邊。今時今日，富人有富人家庭爭產爭到劍拔弩張，對簿公堂，普通人家雖然冇產好爭，但亦唔見得開心幾多，唔講弒父殺母一類極端例子，基層市民手停口停，搵朝唔得晚，想同家人見面溝通都難，就算坐埋一枱，都各自做其低頭族，同陌路人唔差得幾多，咁搞法，家庭核心價值有乜法子唔受挑戰吖。

最慘嘅係，社會愈來愈政治化，藍黃壁壘分明，連家庭都淪為戰場。正如有人話齋，朋友同事間政見不合拗到面紅耳熱，最多都係講少兩句甚至unfriend都仲得；但家人冇得揀，話不投機半句多，唔通unfamily咩？大家留意吓身邊，自佔領運動以來，好多父母子女、兄弟夫妻都因為政治陣營不同而面左左，呢啲咪就係「家門不幸」囉！

所以話，宗教領袖一席話，的確係苦口婆心嘅荒漠甘泉，怕只怕樹欲靜而風不息，想搞事者金盆洗手喎，與虎謀皮好過。第樣唔講，淨係一個版權條例修訂都搞到滿城風雨，甚至有大專學生涉嫌參與縱火爆炸活動添！家庭冇父慈子孝，為人師表毀人不倦，學生醉心街頭，喺呢個價值觀大兜亂嘅年代，偏偏仲有人稱「廢嶽」嘅平機會主席周一嶽之流喺度庸人自擾，建議就異性及同性「事實婚姻」立法，直頭添煩添亂！

點講都好，聖誕節普天同慶，連戰場敵軍都可以暫時休戰，班攪屎棍都好應該暫時消失，還市民幾日耳根清淨喇啩，叮！