城中鏡：郭晶晶拍宣傳片 改寫象未來
有跳水王后之稱嘅前國家跳水運動員郭晶晶嫁到香港後，間唔中陪老公霍啟剛出席吓活動，佢自己擔綱嘅就大都與慈善有關，近日，佢應世界自然基金會香港分會邀請，拍攝咗「改寫象未來」嘅宣傳片，幫手呼籲香港政府禁止象牙貿易和加工。
郭晶晶喺宣傳片中呼籲保護大象。
晶晶喺宣傳片中話，希望大眾嘅影響幫手改變現狀，令下一代都依然可以睇到大象呢種令人讚嘆嘅動物。唔講唔知，香港原來係全球最大嘅象牙零售市場，而美輪美奐嘅象牙工藝品背後，卻係一個個大象被獵殺嘅故事。所以晶晶希望大家齊齊參與保護大象嘅行動。
