城中鏡：樂聚社企賀聖誕
聖誕節臨近，中華總商會青年委員會早前就搶閘喺政府總部嘅東華三院屬下社企iBakery舉行聖誕聯歡。中總青委會主席黃楚恒（Stanley）話，今個聖誕派對特別有意思，事關早前青委到iBakery位於大圍嘅工場參觀，得知iBakery僱用嘅員工逾半為殘疾人士，所以今年聖誕聯歡特登幫襯佢哋，以實際行動支持。
數十名中總青委幫襯東華三院社企餐廳，齊齊開心迎聖誕。
黃楚恒（中）、林智彬（左）及張俊勇以行動支持社企。
楊燕芝（右）及趙式浩近年在中總青委冒起。
當晚有數十名青委兄弟姊妹到場，唔少係城中名人二代，包括副主席林智彬（Lawrence）、周雯玲、常委陳惠儀、中總會長楊釗嘅姪女楊燕芝（Jennifer）及城中名人趙世曾兒子趙式浩等人。身兼旭日金融投資副總監嘅Jennifer加入青委多年，近一、兩年先至為外界留意，現時負責集團嘅地產同投資業務。講起近排樓股匯市場多變，唔知邊度先至係資金嘅安全港呢？Jennifer就笑笑口話依家揸現金最安全喇！
張俊勇陪囡囡過海上假期
最近研發及創新成為各界探討嘅熱門話題，家族同日本大玩具商合作幾十年嘅Lawrence有好大感觸。佢話，日本由上世紀七十年代開始推動動漫文化，如今已經好成熟，唔少日本男士嘅背囊都掛住小玩偶，大家都唔覺得突兀，認為中國市場咁大，應該努力培養幾個出位嘅明星角色。青委會常委張俊勇都有到場，今個聖誕，佢將陪兩個囡囡參加一個台灣親子郵輪團，一於慢條斯理過個海上聖誕。
