俗語有話古老當時興，今時今日就係古老有價！聖誕來臨，唔少人都會買份禮物氹吓至親或仔女，有收藏品網站嘅資料顯示，原來唔少有紀念價值嘅聖誕禮物都會身價倍增，唔信，變形金剛嘅首辦公仔舊時賣一百六十蚊，今時今日就可以值六千幾蚊，信未？

收藏愛好者網站JustCollecting話，八十年代嘅玩具如果保存得好，升值潛力唔少，原因係班70、80後今時今日已經長大成人，唔少人都想搵番童年回憶，可惜啲玩具絕晒版，好多人就會上網投番嚟，「童年回憶」有價，亦造就一批古老物品好值錢。

再譬如八三年出嗰部任天堂紅白機，家吓升值咗151%。如果你有部七九年嘅Sony Walkman，升值更高達250%添。所以，揀禮物時花啲心思喇！

第一手消息請下載on.cc東網iPhone/iPad/Android/Windows Phone Apps