政壇：搞搞政：陳曼琪「洗底」 謀法律界議席

去年佔領行動（佔中）期間，代表潮聯小巴申請禁制令嘅律師陳曼琪，原本係「建仔」民建聯嘅成員，但佢宣布明年一月退出已加入咗十五年嘅建仔，至於退黨原因，則係佢身為香港中小型律師行協會（協會）創會會長，對該會嘅發展有不可推卸嘅責任喎。

聲稱專注協會事務

綜合政圈多方消息指，退黨鬆綁嘅陳曼琪今次聲言要專注協會事務，疑劍指法律界功能界別議席，因為法律界一向由泛民主導，連逾百年歷史的律師會亦被指「淪陷」，去年首次以大比數把當時會長林新強罷免。只係，陳曼琪嘅建仔成員身份，被指有利更有弊，今次佢退黨係咪為咗「洗底」，大家自己諗喇。咁究竟佢會唔會參加明年立法會法律界功能界別議席嘅競逐呢？陳曼琪表明「政治一日都嫌長」，永不說不！

○三年開始任黃大仙區議員的陳曼琪，一二年另起爐灶成立法律界嘅協會，今次更退埋黨，睇嚟選定另一跑道博「升呢」嘅機會真係好大。