政壇：建制編更 壽終正寢
立法會原定月初恢復二讀俗稱「網絡23條」的《二○一四年版權（修訂）條例草案》（草案），但因法定人數不足而流會，有人歸咎商務及經濟發展局局長蘇錦樑箍票不力，亦有建制派議員表明拒絕編更留守開會，以防止流會，結果喺泛民不斷突襲下，有多次差點因為開會人數不足而流會，有消息話，建制派嘅編更制已經壽終正寢，原因據講同富貴黨及經民聯兩個商界政黨有關，因為兩黨中人不時彈開，估計兩黨阿頭方剛及林健鋒都心知肚明。
其實編更制瓦解有迹可尋，建制派班長葉國謙都曾經講過，建制派困在會議廳開會，而泛民「飲咖啡溝女」並不公平。亦有消息透露，建制派本身都無心戀戰，其中有「壞孩子」之稱嘅富貴黨一向不跟隨大隊，每次開會都只留一至兩人在會議廳；經民聯喺流會當日，亦只有兩人在席，於是其他建制中人就開始有微言，點解永遠都係佢哋留守，久而久之，亦令編更消失，難怪無論草案二讀前流會當日或之後嘅會議，建制派都人數不足。
其實編更制曾經算行之有效，好似今年四月立法會就一五至一六年度財政預算案進行二讀辯論，建制派罕有同部分泛民達成編更協議，確保立法會每個時段都有足夠法定人數，可以喺響鐘五分鐘內返回會議廳，以防止流會。到咗版權修訂條例一冇編更，議會就成日聽到「催魂鐘」。
泛民玩嘢 壓力更大
被指「飲咖啡溝女」嘅泛民經常以建制派齊人就不會流會為理由，反駁政敵，據聞此話亦都令到建制派相當困擾，不懂如何招架之餘，亦擔心市民會將流會責任放在佢哋身上。
正所謂「食得鹹魚抵得渴」，建制派好應該知道自己嘅角色，冇編更制下，議員蒙受嘅壓力只會更大，佢哋真係要醒醒定定。
