有個廣告係咁講嘅：「唔係想食你煮嘅麵，只係想見多你幾面。」屹立中環九十年嘅民園麵家，敵唔過時代變遷而面臨結業，香港即將又少一間傳統特色老店，想見多你幾面都冇機會，諗落幾唏噓。

民園麵家可以話見證香港近一個世紀嘅風風雨雨及歷史變遷，成為港人嘅集體回憶。該麵家當年以大牌檔形式經營，後來繼承人接手，由於當時條例規定唔准轉讓牌照畀非直系親屬，觸發一場保育風波，最終迫使政府修例。民園之後改為地舖經營，可惜店主年事已高，加上後人無意繼承，無奈之下宣布明年三月結業。該店嘅招牌牛腩豬手水餃遠近馳名，唔止陪伴唔少街坊成長，更吸引唔少名人幫襯，家陣臨別依依，好多熟客都話除咗唔捨得特色美食，更加唔捨得嗰份人情味。

咁又係吖，好似民園呢類特色老店買少見少，人情味已所餘無幾嘅喇。呢，有近八十年歷史、全港碩果僅存嘅園林式酒家沙田龍華酒店，一度因為續牌問題而瀕臨結業，幸好最後獲批一年臨時牌照；銅鑼灣一間超過五十年歷史、曾經係著名電影取景場地嘅扒房，亦因為不敵租魔而關門大吉。今時今日嘅香港，營商環境愈來愈惡劣，搞到幾乎清一色係大型連鎖店，毫無特色可言，人情味就冇喇，銅臭味就大把。

冇計喇，傳統老店好多都係家庭式經營嘅小本生意，今日地產獨大，營商成本不斷上升，想繼續經營都幾難。就講大牌檔吖，原本係流動熟食檔，之後發展成固定式熟食攤檔，當時政府為咗規範化管理，向有關商販發牌，由於比一般小販嘅牌照大，所以就叫「大牌檔」。上世紀五、六十年代全盛時期，持牌大牌檔有千幾個咁多，可以講成行成市，養活唔少基層家庭㗎！

可惜吖，時移勢易，滄海桑田，大牌檔早就畀連鎖快餐店取代，呢種胼手胝足、自力更生嘅獅子山精神，亦離香港愈來愈遠咯。大家有眼見，今日嘅香港紛紛擾擾，內鬥不斷，搞到不斷沉淪，有啲人唔係自強不息，一味怨天尤人，賴社會冇上流機會。其實正如西諺話齋︰上帝只會幫助自助嘅人。如果自己唔爭氣，再多嘅機會都冇用喇！

此情可待成追憶，只是當時已惘然。傳統老店消失，固然令人惋惜，最怕港人連自力更生嘅鬥心都消失埋，咁就真係無藥可救嘞，叮！