食物及衞生局官員近期可謂多災多難，繼副局長陳肇始跌傷右手後，局長高永文月初又喺一個長跑開步禮中仆倒，跌至血流滿臉，連政治助理陳凱欣日前都炒車，幸好冇受傷。一局咁多傷兵同不幸事，搞到署理局長嘅陳肇始都心有戚戚，話等局長高永文返工後，都要諗吓切燒豬睇風水咯。

陳肇始

由於高永文要放病假養傷，陳肇始要頂硬上，不時帶傷出席不同活動。佢尋日又到威爾斯親王醫院出席器官捐贈感恩禮，致詞時不禁慨嘆辦公室風水唔好，仲話要等高永文復工時，都要諗吓切燒豬、睇吓風水喎，唔知使唔使檻埋火盆呢？慶幸嘅係，高永文身體康復得唔錯，早前縫針嘅位置已經全部拆線，即使在家中休息，都好勤力咁用電郵與同事保持聯絡。

第一手消息請下載on.cc東網iPhone/iPad/Android/Windows Phone Apps