政壇：發揚「機場」功能 葉劉再吸新血
區議會選舉剛結束，各黨派都重整旗鼓備戰明年立法會選舉，上月區選首遇滑鐵盧嘅新民黨，主席葉劉淑儀近日頻頻在社交網站發功，招攬年輕人入黨，但佢介紹嘅著名黨員唔係已退黨轉任政府，就係選舉敗陣。
葉劉淑儀（中）喺社交網站發功（上圖），高調招募年輕黨員。
（互聯網圖片）
葉劉早前批評好多年輕人當佢係「跑道」，利用佢嘅網絡識人跟住加入政府。話口未完，葉劉又要推介佢嘅「機場」功能，喺社交網站話從美國回港九年，先後成立匯賢智庫、新民黨等，吸納好多年輕人才，包括曾任南區區議員、現已官至政制及內地事務局副局長嘅陳岳鵬，同曾任匯賢智庫研究總監嘅教育局政治助理施俊輝，但二人同葉太早已成為過去式。葉劉話，區選結果反映選民想多啲年輕面孔參與，所以想招攬有幹勁又捱得嘅後生仔加入，仲話有志之士唔使名校出身，反正名校生好難留得住佢哋做地區工作喎。
