政壇：李鋈麟玩過山車當體檢

前啟德機場跑道有個為期三個月嘅東華慈善嘉年華，提供唔少機動遊戲畀愛好剌激嘅市民，連啲名人都躍躍欲試。東華三院副主席李鋈麟話，好鍾意玩機動遊戲，月前曾去過新加坡環球影城玩過山車，仲話唔玩唔知身體好添！

李鋈麟鍾意緊張刺激嘅機動遊戲。

李鋈麟話，玩過山車嗰陣，心情既驚且怯，相當刺激，個人嘅心臟、血壓、耳水及眼角膜都唔可以有問題，所以每玩一次過山車，等如身體又通過一次考驗。佢話外國好多主題公園嘅機動遊戲都夠膽去玩，但係內地嘅機動遊戲就例外，因為保養維修令人顧慮，為安全計，佢都盡量唔玩內地嘅機動遊戲。

另一位東華三院副主席王賢誌（Vinci）就話，如果約埋一班朋友去玩都好嘅，因為三五好友喺機動遊戲度一路玩一路嗌，又確係好過癮嘅。