政壇：青政攔路 突襲公文袋
立法會新界東補選明年二月底舉行，公民黨（公文袋）本來獲泛民主派一致推舉，但青年新政（青政）卻擬突擊「攔路」，仲一度要求舉行初選。尋日雙方第二次正式會面，會後，公文袋單方面宣布「雙方同意擱置是次初選的建議」，氣氛睇上去似乎和諧。不過，青政會唔會咁易罷休呢？佢哋會後隨即宣布四十八小時內啟動投票機制，由青政內部百多名會員投票決定係咪派人出選！如果佢哋決定出擊，咁公文袋勢中界票伏擊，大家分分鐘攬住雙失都似。
投票決定參選與否
有份出席會面嘅公文袋秘長書賴仁彪話，雙方喺參選理念、初選可行性出現分歧，認為短時間內完成初選，再籌備補選肯定唔夠時間，所以決定擱置，其實之前佢哋黨魁梁家傑已經語多保留嘞。咁青政參選，會唔會影響公文袋嘅勝算？賴就話該黨過去參加補選成績都唔錯，今日佢哋就會正式公布公文袋參選人，一於先聲奪人。至於青政方面，佢哋就話初選方案要雙方認受至可行，「唔能夠單方面係咁嗌」，暗示係公文袋單方面推倒初選囉。
青政召集人梁頌恆又話，會於二十四小時內向會員交代會面決定，緊接嘅二十四小時再向會員發短訊，要求佢哋就青政係咪參加補選表態，假如支持參選嘅比率較高，投票率亦逾四成嘅話，就會內部推舉補選參選人。不過，梁頌恆就吹淡風，話個人傾向唔派人參選，但就表明就算青政參加都唔能夠話佢哋界走公文袋嘅票，皆因過去民調顯示雙方支持度不相伯仲，冇話邊個界邊個。
其實青政提出初選都係避免雙方堅持派人參選而互相界票，令建制派漁人得利，但青政目前勢頭強勁、知名度高，雙雙參選唔係冇得較量，假如公文袋派出堂堂大狀楊岳橋參選，最終得票仲少過青政就真係搵窿捐喇！
