「叮叮噹，叮叮噹，鐘聲四處響」，呢首歌一響起，就知道普天同慶嘅聖誕節就快到嘞。不過咁，如果喺立法會聽到「叮叮噹」，咁就頭痕喇，顯示又有人拉布響鐘，對呢啲無日無之嘅噪音，政客唔厭，市民都厭喇。

呢嗱，立法會尋日繼續審議版權修訂條例，由於激進議員拉布，多次要求響鐘點人數，令議程嚴重受阻，結果又係不歡而散。尋日係今年最後一次會議，議員拍拍屁股去歡度聖誕，議案就要留待明年一月至繼續審議，以咁嘅形勢嚟睇，到時一啲都唔樂觀，隨時又係跪低收場都似。港府「成熟一項，推出一項」，變成「推出一項，跪低一項」，都唔知好笑定好嬲。

係人都知，立法會有名叫「垃圾會」，爆粗掟嘢係平常事，拉布流會更係家常便飯，早排議事堂上仲懷疑有糞便添，你話成何體統吖。難怪有人話立法會唔止烏煙瘴氣，直情係臭氣熏天。

立法會亂象多多，莫講話市民睇到眼冤，連立法會主席都冇晒符，惟有懶幽默咁話，立法會休會，最少有兩周時間唔使再聽到點名嘅「催魂鐘」喎。其實，唔止立法會主席唔使聞鐘色變，市民呢兩個星期亦樂得耳根清淨吖。

講開又講，政客拉布怠工當食飯，版權修訂條例受阻只係冰山一角咋。呢，立法會財委會、工務小組及人事編制小組三名主席總結今屆會期三個月來嘅會議進度，簡直係慘不忍睹。好似工務小組咁吖，原定審議七十二項合共六百七十幾億元嘅工程項目，結果只召開六次會議，通過四個工程項目，涉及四點七億元咋，你話死唔死吖。人事編制小組亦唔好得幾多，原定審議二十四個項目，至今只開咗四次會，通過一個項目。財委會仲大劑，依家仲有十八個項目待審議。

冇計啦，有啲政客不務正業，一味譁眾取寵，早已經唔係乜嘢新聞。佢哋冇嘢叻，最叻就係無事生非，任何議題都政治化，好似港珠澳大橋及高鐵工程咁吖，港府監管不力固然責無旁貸，反對派成日拖後腿亦難辭其咎，搞到工程一拖再拖，造價一漲再漲，都唔知點埋尾。

正所謂民生無小事，政治爭拗唔可以當飯食，政客興風作浪，只會搞到香港內傷沉淪嘅咋。再咁落去，最怕香港遲早鐘聲長響，唔係聖誕鐘，而係喪鐘呀，叮！