城中鏡：首飾展任Model 珠寶小姐人氣升
香港珠寶製造業廠商會主辦嘅第四屆「香港珠寶小姐」早前圓滿結束，三位得獎珠寶小姐冠軍何麗莎、亞軍許倩慧同季軍吳嘉琪，一當選即履行職務，連續兩日為珠寶展擔任示範模特兒，未來兩年嘅任期內，佢哋會頻頻出席珠寶活動，成日佩戴精美、名貴嘅珠寶，難怪三位靚女都零舍開心。
三位珠寶小姐吳嘉琪（左起）、何麗莎同許倩慧當選後，頻頻出席珠寶活動。
冠軍得主何麗莎曾喺馬來西亞做模特兒，自當選後人氣急升，其Instagram粉絲急升至七千，facebook粉絲亦穩步上揚。亞軍許倩慧樣子甜美，喺場內亦受歡迎，佢話：「我啲朋友已經唔再叫我個名，索性叫我做珠寶小姐。」講起近日示範珠寶嘅工作，佢話女仔都鍾意靚嘢：「上次示範一隻坦桑石戒指，好大粒，好開心，同埋都了解多咗珠寶，以前淨係知道有紅寶和藍寶，原來仲有海藍寶，一向特別鍾意藍色，藍得好靚。」
